Քննարկմանը մասնակցել են նաև Կրթության, գիտության, մշակույթի և սպորտի նախարար Ժաննա Անդրեասյանը, ՀՀ-ում ԵՄ պատվիրակության ղեկավար, դեսպան Վասիլիս Մարագոսը և ՄԱԶԾ մշտական ներկայացուցիչ Նաթիա Նացվլիշվիլին։

 

 Նախարար Թորոսյանը խոսել է սոցիալական պաշտպանության ոլորտում իրականացվող բարեփոխումների մասին՝ ընդգծելով պետական կառավարման համակարգում նորարարությունների իրականացման կարևորությունը։ Մասնավորապես, անդրադարձ է կատարվել «Spark» համակարգին, որը նպաստում է պետական մարմինների ռազմավարական նպատակների արդյունավետ իրականացմանը, աշխատակիցների ներուժի բացահայտմանն ու մասնագիտական աճին։

 

Արսեն Թորոսյանը նշել է, որ ոլորտային քաղաքականությունների մշակման և իրականացման առանցքում շարունակում է լինել մարդակենտրոն մոտեցումը, ինչն արտացոլված է նաև ԱՍՀ նախարարության նոր տարբերանշանի գաղափարաբանության մեջ։ Այս համատեքստում նախարարը մանրամասնել է խոցելի խմբերին, մասնավորապես՝ հաշմանդամություն ունեցող անձանց մատուցվող ծառայությունների շրջանակը և աջակցող միջոցների տրամադրման գործընթացը, նաև ընդգծել երեխաների պարտադիր կրթության իրավունքի իրացման կարևորությունը։

 

Քննարկման ընթացքում նախարարը շեշտել է նաև Միասնական սոցիալական ծառայության արդիականացման, ծառայությունների հասանելիության և արդյունավետության բարձրացման, ինչպես նաև քաղաքացիների սոցիալական կարիքներին օպերատիվ արձագանքման անհրաժեշտությունը։